Eyeliners

سلام عليكم..

بخبركم عن الايلاينرز الي حاليا استخدمهم.. كنت استخدم ايلاينر من لوريال وكان يستحق الذكر بس مخلص وما لقيته عشان اصوره بس يوم برد آخذه بكتب عنه فمدونة مختلفة.. بتكلم عن الايلاينرز الي لونهم اسود لان عندي ألوان مختلفه وآيلاينرز ملونين بس حسيت ماله داعي وانه اكتفي باللون الاسود الي الكل يحب يستخدمه.. وعندي آيلاينر من ماك بس فاشل فشل ذريع وما يستحق اذكره.. وهالصوره فيها كل الايلاينرات الي استخدمهم حاليا..

 

آيلاينر اسمه اينك لاينر من ميكب فور ايفر واااايد سهل فالرسم وفرشاته رفيعه واذا خربتي الرسمه ممكن انه ينمسح وسواده مب وايد فاحم بس يفي بالغرض والي بالنسبه لي يميزه انه بارد عالعيون.. انا من الناس الي عيونهم واااايد واااايد حساسه وممكن اي ايلاينر او مسكره حاره شوي عالعيون ادمر ميكبي من كثر ما ان عيوني ادمع على اي شي والميكب بيسيح ويكون الوضع بالنسبة لي مأساوي فجدا يهمني ان الايلاينر يكون بارد عالعيون وما يحسس.. يساعد انج ترسمين بكل دقة واشوفه من احلى الايلاينرات الي استخدمتهم.

 

 

من مارك جيكوبس صارلي استخدمه اكثر من سنة وهذا الثاني و على وشك انه يخلص.. بالنسبة لسواده فهو اغمج من ايلاينر ميكب فور ايفر بس فيه لمعة يعني اقصد يعكس الاضاءة مب مطفي وفي بنات ما يحبون هالشي والي تبى الايلاينر مطفي تبتعد عن هالايلاينر اما غير جي فهو وااايد حلو وثابت و واضح وفرشاته سهله فالاستخدام ورفيعه واحيانا ارد احط عليه شادو اسود بفرشاة الايلاينر بحركة خفيفة مثل الطبطبه على الرسمه الي رسمتها بس عشان اخليه مطفي..

 

 

 

قلم الكحل من اربن ديكي.. اتصدقون انصدمت يوم شفت حجمه وانا اصوره لان ما صارلى وايد من خذته بس لانه شمعي مب ناشف فينفع لعدة استخدامات.. جحال داخل العين او ايلاينر من برا او آيشدو بأنج ترسمين الزواية الخارجة من العين على شكل حرف في وبسرعه تدمجين بالفرشاه لان مثل ما قلت انه شمعي وممكن انه يندمج بسهوله بس قبل لا ينشف وأكيد برد اشتريه وفي منه وايد ألوان حلوه..

 

الجل آيلاينر من استي لودر روووعه ومن احلى الجل آيلاينرز الي استخدمتهم.. ناعم ومن تحطين الفرشه علطول تلقط اللون من كثر ما أن الجل قوامه طري وبارد عالعيون يعني ممكن تستخدمينه حتى لداخل العين وسهل فالرسم واستخدم فرش مختلفة وياه على حسب اذا ابى خط وايد رفيع او شوي اغلظ او الوينق آيلاينر.. استخدم فرشاة ماك و زويفا و ريل تكنيك وصورتهم كلهم..

 

هذا الجل آيلاينر من ميبلين واستخدمته فتره وبعدين نشف وحطيته ع صوب وكنت بعقه بس قلت بعطيه فرصه وبحط عليه قطرة من انجلوت ترد قوامه الكريمي.. تقريبا هو نفس الجل آيلاينر الي من ماك و يمشي الحال بس مقارنة مع استي لودر اعتبره مب موجود..

 

 

هاي هي القطرة العجيبه من انجلوت ولازم كل بنيه عندها لانه ينفع مع كل شي.. احطه مع البقمنت او الشادو ويوضح اللون واي شي فقدتي الامل منه حطي عليه من هالقطره وبيردلها الحياه هههه.. دايما عالتسريحه لان يوم شادو لونه مب واضح احط شوي من انجلوت ويوضح اللون ونفس الشي مع البجمنت..

 

 

xoxo

Mahooy

تجربتي مع الكونسيلرات من ماركات مختلفة Reviews on Concealers

مرحبا بنات..

اكثر شي جربته فالميكب واكثر شي اشتري منه حتى لو عندي انواع ثانيه هو الكونسيلر.. من سنوات وانا كان تركيزي دايما عالكونسيلر .. ليش؟؟ لاني انسانه احب السهر وطبعا انش الصبح مع هالات حول منطقة العين وماكون حابه احط فاونديشن لان بشرتي صافيه ومافيها اي مشاكل بس ابى اغطي الهالات و ما خليت ماركة ما جربت الكونسيلر من عندهم بدون مبالغة.. كنت استخدم كونسيلر بوبي براون و الكوركتر لسنوات و كونسيلر من ماركة اتش آر وكونسيلر الاستديو من ماك ومن ميكب فور ايفر الي شكله مثل القلم وكانو يعتبرون من احسن الكونسيلرات قبل سنوات اما الحين فصارت منافسة بين الماركات و صارت الكونسيلرات احسن من قبل للبشرات العربيه لان قبل كنت احس ان اكثر الكونسيلرات تناسب البشرات الاجنبية ما تناسبنا.. حاليا استخدم وايد كونسيلرات على حسب الحاجة وبخبركم عنهم بدون ترتيب معين..

 

كونسيلر نارس (nars radiant creamy concealer) استخدمه من قبل لا يفتحون الماركه عندنا فدبي وكنت اطلب من التاجرات ودرجتي هي الكاسترد واحبه وايد هالكونسيلر لان يغطي وينور بنفس الوقت ومب ثقيل بس عيبه انه بسرعه يخلص يعني ما استخدمه بشكل يومي ويخلص فخلال شهر وسعره غالي.. احيانا احطه عالاماكن الي ابى انورها مثل عظمة الخد والخشم وجدا جميل ما يخطط معاي اذا استخدمته صح.

كونسيلر اربن ديكي نيكد (urban decay naked skin concealer) لين الحين ما قدرت احبه وابى افهم ليش يمدحونه بس مادري يمكن لاني ماخذه درجه غلط لان درجتي دوم مخلصه بس احس اني من احطه يختفي مايغطي شي وهو فعلا خفيف بس اباه يغطي وحاولت استخدمه بكل الطرق وما لقيت النتيجه الي اتمناها.. جربته بالبيوتي بلندر وجربت بالفرشاه وجربت اخلطه من كونسيلر ثاني بس مانفع وياي وباقي حل أخير.. ناوية اجربه مع البيوتي بلندر من ريل تكنيك لاني سمعت من خبيرة مكيب ان البيوتي بلندر وايد تتشرب من اي كونسيلر مع الدمج اما اسفنجة ريل تكنيك ما تتشرب الكونسيلر فبتكون هاي آخر محاولة لهالكونسيلر قبل لا استغنى عنه..

 

 

كونسيلر لورا مارسير (laura mercier concealer high coverage) هالكونسيلر فل كفر يغطي عدل بس ثقيييل وربع نقطه تكفي بس انا دوم احط عليه اي كونسلير كريمي شوي وبعدين ادمج لان بروحه صعب يندمج خاصه للي بشرتهم جافه يعني لااااازم الترطيب قبل لا تحطين اي كونسيلر وخاصه هالنوعية وماينفع ادمجه بالبيوتي بلندر ادمجه بصبعي بالطبطبه بحركه خفيفية وسريعه قبل لا يثبت وانا بشرتي جافه شوي خاصه تحت عيوني وما احط هالكونسيلر الا اذا حسيت ان هالمنطقه مب جافه واكون مرطبتنها عدل

 

كونسيلر من ديور (diorskin nude concealer) بصراحه من زماااان ما استخدمته بس احطه اذا مب ناويه احط ميكب واحط شوي بس وتغطيته متوسطه وفي الاحسن عنه..

 

 

كونسيلر تو فيسد (too faced absolutely flawless concealer) لونه جدا جميييل ويغطي وفل كفر بس مشكلته انه واااايد يخطط فقمت استخدمه كبيس للشادو او لتحت الحواجب.

 

الكونسيلر الغني عن التعريف البرو لونق وير من ماك وحبيب الكل (mac pro longwear concealer) .. بصراحه انا ما استخدمه الا للمناسبات لانه يجفف لي منطقة تحت العيون وهي اوريدي جافه واحيانا احسه يخطط شوي يمكن بسبب الجفاف وهو بسرعه ينشف.. تغطيته ما عليها كلام و ما يباله وايد دمج بس انا افضل استخدمه للمناسبات بس..

كونسيلر الدبل وير من استي لودر (estee lauder double wear concealer) وااااايد حلو مع انه احيانا يخطط شوي بس تغطيته ولا اروع وللاسف آخر مره سرت دبنهامس اشتريه قالولي مقطوع من السوق بس بعدني ابى اسأل عنه في هارفي نيكلز او بطلبه من نوردستروم.. ما استخدمه بروحه لازم استخدم معاه كونسيلر نوع ثاني لان اذا بروحه بيخطط معاي..

 

 

 

كونسيلر من ماك (mac studio conceal and correct duo) خذته اول ما نزل ماك لانه جذبني من ألوانه.. حبيت ان نصه كوركتر مايل على برتغالي و الثاني كونسيلر لونه اصفر وانا اي شي مايل للصفار يناسبني فما ترددت وعلطول خذته وتكلمت عنه عدة مرات فالاسناب شات انه وايد حلو وخفيف للاستخدام اليومي بس ترا تغطيته مب فل كفر وناسبني لان هالاتي وايد خفت هالفتره وما احتاج كونسيلر فل كفر.

 

 

 

 

كونسيلر من ماك (mac matchmaster concealer) و صورتلكم درجتي و خذته العام اول ما نزل والحلو فيه سهولة استخدامه انه بس تحطينه فالاماكن الي تبين تخفين فيها العيوب مثل القلم وبعدين تدمجين وارد اقولكم انه مب فل كفر يعني تغطية متوسطه واحيانا احطه وبعدين احط فوقه الهايلت الي ماك الي بتكلم عنه بعد شوي.

 

ادري ان في وايد بنات ما حبو كونسيلر المينرلايزد من ماك (mac select moisturecover concealer) بس انا بالنسبة لي احبه لانه في نسبة ترطيب عاليه وكفره يناسب الطلعات السريعه احب احطه بروحه لانه ما يبين وفيه ترطيب بما ان بشرتي جافه ونفس الوقت ماحس بتانيب الضمير اني حاطه شي يكتم بشرتي يعني ساعات يوم بسير الجم احط بس هالكونسيلر وشوية مسكره

 

 

(mac prep and prime highlighter) هذا من الاشيا الي ما ما استغنى عنه الي يعطي هايلات ومنظر صحي وخفيف وبسرعه يندمج يعني بحطه بروحه اذا هالاتي خفيفه وفي قبله فاونديشن واحطه فوق الفاونديشن تحت منطقة العين بشكل مثلث والاماكن الي ابى انورها وادمج بسرعه ويعطيني نتيجه مرضيه والدرجه الي استخدمها واضحه فالصوره

 

هذا البيبي كريم للعين من ديور (dior hydra life bb cream) و باختصار ما منه فايده و يخطط .. احطه فالطلعات الصباحية كحمايه من الشمس ويخطط رغم اني احط عليه لوس باودر بس ماشي فايده

 

 

 كوركتر من ماك (mac studio finish corrector orange) وما استخدمه لانه ثقيل وايد وقمت استخدم الكوركتر الي من باليت انستازيا لانه كريمي اكثر ودرجته تناسبني اكثر من هذا بس الي عندها وايد تصبغات ترش فكس بلش عالفرشه و بالفرشه نفسها تاخذ شوي من هالكوركتر وتحطه عالاماكن الي فيها التصبغات قبل الفاونديشن.. كنت استخدم كوركتر بوبي براون بس استغنيت عنه بس ما لقيت اشيا بديلة..

 

 

المره اليايه بخبركم عن تجربتي مع الكريمات المرطبة لتحت العين..

 

xoxo

Mahooy

منتجات من ماركة كيكو الايطالية Kiko

مرحبا بنات..

قبل شهور اشتريت بعض المنتجات من ماركة كيكو الايطالية وكنت موصية عليهم اختي اتيبلي اياهم من ميلان وللاسف كانو مخلصين الالوان الي كنت متحمسه اباهم من الشدوات بس خذت الوان مختلفة وما صورتهم فبخليهم للبوست الياي ان شاءالله.

في نوع مختلف من الشدوات خذت منه لون واحد بس عشان اجرب هالنوعية فخذت اللون البني الي ينفع لمعظم اللوكات ومن درجات البني الي احبها..

 

 

هذا هو الشادو الي اخترته وتلفون رقمه فالصوره الي تحت

هاللبجمنت من مسحه وحده واللون قوي وثابت

خذت روجين

 

الروج الأول

 

 

الروج الثاني

 

 

الروجين فيهم ترطيب عالي والوانهم واضحه يعني ما توقعت انهم بيكونون ناعمين عالشفايف بس ما يثبتون لوقت طويل  وبحطلكم سواتشز للروجين
 

 

 

 

وبكتب في بوست قريب عن باقي الشدوات من النوع الثاني الي خذتهم..