Hourglass Ambient Lighting Palette and Hourglass Ambient Lighting Blush Palette Review / منتجات من آورقلاس

اليوم كنت اتصفح صور الانستقرام و شفت صورة جميلة لمنتج يديد بينزل من آورقلاس في آخر السنة مع كوليكشن الهوليدي.. الباليت يأسر القلب بس اللي عندهم الباليتات للبلاشرات Hourglass Ambient Lighting Blush Palette و الاضاءة Hourglass Ambient Lighting Palette من قبل فبيكون نوعا ما باليت مكرر.. فما أدري اذا بطوفه بما ان عندي هالبايتات أو بتحمس وبطلبه..

 

اللي ما عندهم الباليتات السابقة بتكون فرصة حلوه لهم انهم ياخذون الباليت اليديد و هالشي الي خلاني افكر احط رفيو بسيط وصورت الباليتات الي عندي وبتكلم عنهم بشكل عام..

هالماركة مب موجودة عندنا فالخليج ولا فدبي وانا كنت طالبتنهم من موقع اماراتي كانو يوفرون اشيا مختلفة من هالماركه بس ما قامو يوفرونها فما بفيدكم لو حطيت اسم الموقع..

 

 

 

هذيل هم الباليتات وطبعا باليت الاضاءةHourglass Ambient Lighting Palette نزل قبل باليت البلاشرات Hourglass Ambient Lighting Blush Palette و اللي لاحظته ان الفرق بين هالباليتات و باليت الهوليدي الي بينزل آخر سنة 2015 أن بدال واحد من البلشرات حطو برونزر وانا برايي انه باليت متكامل بحيث انهم دمجو معظم البيست سيلر من الاضاءة والبلاشرات و البرونزر في باليت واحد

 

 

 

 

باليت الإضاءة Hourglass Ambient Lighting Palette من أورقلاس فيه 3 أنواع مختلفة من البودرات مثل ما انتو شايفين الاسامي فالصورة ونبدا من اليسار لليمين : 

 

 Dim Light إضاءة بلون بيجي خوخي طبيعي لونها تقريبا نفس لون البشرة  /  Incandenscent Light إضاءة بلون أبيض على وردي لؤلؤي فاتح  /  Radiant Light إضاءة بلون برونزي على برتقالي ذهبي

 

أذكر اني كنت اتابع مسلسل قوسيب قيرلز وهو من احلى المسلسلات عندي وكنت ومازلت معجبة بشخصية بلير وكنت احب ميكبها الي دوم فيه لمعه خفيفة فالويه مب شمير او قليتر لا لا لمعه صحية ونضارة وكنت اتمنى اوصل لهاللوك ويوم استخدمت هالباليت اتذكرت بلير من قوسيب قيرل لانه تقريبا عطاني نفس اللوك الي بلمعه خفيفة للصبح و شكلها صحي مب اضاءة ملحوظة انج حاطة شي فويهج.. الي ابى اوصل له ان هالاضاءه تنفع للصبح لانها خفيفة ماتبين وما تلقين من بعيد بس يعطيج منظر صحي لان حبيبات هالبودرة جدا ناعمة

 

 

وني للباليت الثاني  Hourglass Ambient Lighting Blush Palette  واللي بعد فيه 3 ألوان جميله بدرجات متنوعة من البلاشرات

 

 Luminous Flush وهاللون متوفر بروحه يعني ينباع كسنقل بلاشر ولونه وردي هادي ممزوج مع اضاءة ليمونس لايت واستخدمه يوم ابى لوك ناعم

 Incandescent Electra و هاللون الوحيد اليديد وحصري لـ هالباليت واللي مش متوفر كسنقل بلاشر ولونه خوخي ناعم ممزوج مع اضاءة انكندسنت لايت وهذا أكثر بلاشر حبيته

 Mood Exposure و ايضا هاللون متوفر كسنقل بلاشر ولونه بالم ممزوج مع اضاءة مود لايت وجدا جميل هاللون  مع اني فالبدايه ما حبيته قبل لا اجربه

 

احيانا ادمج اكثر من لون من نفس الباليت ويعطيني منظر أحلى يعني كل وحده على حسب ما تحب ممكن تدمج اكثر من بلاشر بلمسات خفيفه

 

xoxo Mahooy

 

جميع الصور من تصويري الخاص باستثناء الصورة الأولى والثانية لباليت الهوليدي من آورقلاس 2015

 

كريمات من كيلز Kiehl’s Rosa Arctica Youth Regenerating Cream Review

 

 

منتجات كيلز أظني غنية عن التعريف ومن المنتجات المعروفة بجودتها و بين فترة وفترة أحب أجرب آخذ من عندهم أشيا يديدة أجربها وبخبركم اليوم عن منتجين.. كنت سايرة باخذ سيروم الميد نايت الازرق لأن كان مخلص الي عندي و قعدت اطالع فالكريمات أفكر شو آخذ.. لفت انتباهي هالكريم بما اني كنت شايفتنه عند هدى بيوتي من زمان وكانت تمدحه فقلت أجربه وخذته.. اول شي بخبركم اياه انه يناسب البشرة المختطله والدهنيه وما بيناسب الجافة.. لان قوامه غليظ شوي يعني للي بشرتهم جافه ماظني راح يفيدهم أما بالنسبه للي بشرتهم دهنية أو مختطله راح يعيبهم لان يرطب البشره بدون ما يدهنها يعني تحسينه يعطي ترطيب ونضارة لبشرتج بدون ما تحسين بانج حاطه مرطب.. البشرة بسرعه تمتصه لان مثل ما قلت ان قوامه غليظ لدرجة اني احطه ع منطقة التي زون وماحس اني حاطه شي وفنفس الوقت يعطي ترطيب ومنظر صحي واذا استخدمته لوقت الليل قبل النوم ألاحظ ان بشرتي ناعمه ورطبه بطريقة حلوه..
 

 

مكتوب انه يعطي منظر شبابي ويشد البشرة ويرطبها ويخفف من الخطوط الرفيعة ويحمي البشرة من علامات تقدم السن و على فكره هالكريم ما يناسب الي عمرهم تحت ال 25 ع كلام البايع وفالبداية قالي ما انصحج فيه لان بس للي عمرهم فوق ال 25 وكان ودي أقوله صح كلامك ما أحتاجه ع أساس ان عمري تحت ال 25 ههههه بس لا طبعا أحتاجه

 

 

 

اللي بتستخدمه بتلاحظ ان قوامه غليظ يعني يوم بتحطينه خذي شوي وافركيه بأطراف صبوعج وبعدين حطيه ع ويهج لان صعب يتوزع اذا ما فركتيه شوي عشان ياخذ من حرارة الجسم وينفرد بسهولة
 

 

 

الكريم الثاني عبارة عن كريم مرطب مع واقي من الشمس و أرد أنصح فيه لذوات البشرة الدهنية بألأخص وكل انواع البشرات.. أحطه الصبح قبل الميكب وما دهنت وياي منطقة التي زون يعني اثنين فواحد.. انه يعطيني الترطيب الي احاجه و واقي من الشمس بدون ما يسببلي اي مشاكل فمنطقة التي زون

 

انا خذته من محل كيلز دبي مول وبتلقونه في مركاتو و الفستفال وهارفي نكلز وأظني في بلومينق ديلز بعد

 

تجربتي مع Urban Decay B6 Vitamin-Infused Complexion Prep Spray

 

 

سلام عليكم حبوبات.. انتشرت اسبريات البشرة في الثلاث سنوات الاخيره من عدة ماركات.. أذكر اول ما عرفنا الاسبري قبل سنوات كان الفكس بلس من ماك وبعدين من ميكب فور ايفر وبدا شوي شوي ينتشر بس طبعا كل اسبراي يختلف عن الثاني.. اقصد انه يختلف للغرض الي بتسخدمينه يعني في منهم يعتبرون برايمر لتهيئة البشرة قبل الميكب وفي منهم لتثبيت الميكب كخطوة أخيره وفي منهم للبشرة الدهنية بحيث يساعدها انها ماتدهن اطول فترة ممكنه وفي منهم للبشرة الجافة يعطيها ترطيب... اربان ديكاي من الماركات الي عندهم عدة اسبريات للبشرة على حسب نوع البشرة أو مثل ما قلت على حسب الغرض الي تبين تستخدمينه يتم اختيار الاسبري المناسب.. الاسبري الي بتكلم عنه عبارة عن تهيئة للبشرة وبرايمر والأهم انه ينفع للبشرة الدهنية

 

شو يسوي هالاسبراي ؟

Urban Decay B6 Vitamin-Infused Complexion Prep Spray

 

 

 

يحتوي على فيتامين بي 6 اللي يساعد على امتصاص الدهون ويقلل من المسامات ويخفف من الاحمرار ويرطب البشرة بالمعادن والفيتامينات

 

وعن تجربة وايد حبيته و اكيد برد أشتريه كل ما يخلص وأحيانا يغنيني عن كريم الترطيب قبل الميكب وطبعا تقدرون تستخدمونه بعد الميكب بيعطيكم انتعاش وبيدمج الميكب بطريقة حلوه بس ما اظني يثبته و انا من النوع الي وااايد أرش احس ان الاسبراي يفيد البشرة ومثل مغذي وأحلى شي فهالاسبراي المرش.. الفكس بلس من ماك يرش مكان واحد وتحسين رشته قويه مب وايد موزعه أما هالاسبراي من ترشينه تحسين بخفة رشته ويتوزع بطريقة حلوه عالويه كامل مب بس جهة المكان الي رشيتيه واللي استخدموه أكيد بيفهمون قصدي وحتى يوم بخلص قلبي يعورني أعقه لان مب أي اسبراي يرش بهالطريقه

 

 

تلقونه في أفرع محلات سيفورا وانا خذته من سيفورا مردف سيتي سنتر فدبي

 

 

xoxo Mahooy

 

  

تجربتي مع فاونديشن اف سان لوران Yves Saint Laurent Fusion Ink Foundation

 

السلام عليكم بنات.. كنت حابه اتكلم عن هالفاونديشن من زمان اول ما خذته بس كان صعب علي إني ألتزم بالمدونة لانشغالي فالدوام واشياء ثانيه وقلت خلاص مابكتب عنه لان حلاته فوقته بس من كثر ما اني حابه الفاونديشن قلت بوثق تجربتي عنه فالبلوق للي حابه تشتريه .. اول شي بخبركم عن نوعية بشرتي عالسريع . بشرتي مختطله يعني عاديه وعندي التي زون دهنية.. اذكر اني قبل سنوات خذت فاونديشن وبودره من اف سان لوران على مدح البياعة وكانو غالين وابدا ابدا ابدا ما حبيتهم وطاحو فجبدي وقلت مابرد آخذ من هالماركه الفاونديشن لان ممكن يناسب بشرات الاجانب بس مب العرب.. قبل شهور وتحديدا في فبراير هالسنة شفت وحده فالانستقرام تمدحه مدح مش طبيعي وقلت إلا اجرب هالفاوديشن وأعترف اني مدمنة فاونديشنات أحب اشتري فاونديشن يديد كل شهر.. 

 

 

المهم إني سرت سيفورا وجربته وشفت الدرجة النسب للون بشرتي وكنت حريصة إني أختار من درجات البيج مش من درجات البينك..

فنفس اليوم الي اشتريت فيه الفاونديشن كان عندي عزيمة واستخدمته.. علطول متحمسه إني اجربه هههه المهم إني واااايد حبيته لأنه يعطي منظر طبيعي للبشره وخفيييف عالبشره ما تحسين إنج حاطه شي فويهج.. تركيبته بسرعه تنشف يعني من تحطينه علطول وزعيه وبسهوله يندمج وماتحسين فيه وريحته من الروايح اللي أحبها..

 

 أنا ما جربت أوزعه الا بفرشاة سيقما الاف 80 وأحس ان هالفرشاة هي الأنسب لهالفاونديشن.. يوم رديت البيت لاحظت أن الفاونديشن بعده مثل ما هو ما تاكسد ولا تغير لونه وبعده مثل ما هو ولا خطط بس حابة اقول ان منطقة التي زون تحتاج انج اطبطبين عليها ببودره ولا ممكن اتدهن معاج بعد ساعات وهالشي مب دوم يصيرلي يعني من تغير الجو وصار حر لاحظت هالشي وأتوقع ان هالشي طبيعي مع جونا والرطوبه فدبي.. ما فيه حمايه من الشمس ومخلتنه لطلعات المسا اكثر شي وأحبه كثر ما أحب فاونديشن دولتشي آند غابانا

 

بالنسبه للدرجة ترا هاي هي الدرجة الي خذتها وحطو فبالكم انكم تاخذون الدرجات الي بدايتها بي دي لان معناته إنه بيج وهذا الأنسب للبشرات العربيه.. انا خذت بي دي 40 وهالدرجة افتح عن لوني بشي بسييط لان الدرجة الي كانت اغمج ما ناسبتني واستخدم وياه بودره غامجه او بودرة التان من ديور

 

أتمنى إني أكون افدتكم بعرض تجربتي وأنصح بهالفاونديشن للي حابه تجرب شي يديد وبتلقونه في سيفورا وبكتبلكم سعره إذا لقيت الفاتورة

 

xoxo Mahooy